بتحطي صورك على الفيس بوك!! ممكن لحظة!!

السلام عليكم و رحمة الله و بركاته


أولا أزيكم عاملين أيه؟
فى البدايه…. هذا الكلام لأخواتى فى الله البنات المسلمات المشتركين فى الفيس بوك….
ولم أبتغى سوى وجه الله فى هذا الكلام… الدين الإسلامى حثنا على النصيحه
و كل الكلام ده من باب النصيحه وحب الخير للغير

فى بعض أخوتنا البنات بتحط صورتها على الفيس بوك و المنتديات….. أو صوره ممثله عاريه أو ..أو……
سنقسم الحديث إلى قسمين….

الأول…..كلمتى الى أخواتى البنات اللى بتحط صورتها الشخصيه كصوره للبروفايل بتاعها…
تخيلى لو واحد اخلاقه مش تمام وشاف صورتك (المحترمة جدا) وقعد يبحلق ويتفرج نص ساعة
طيب تخيلى ان اخينا ده خدها على موبايله وفرج اصحابه عليكى على انك صاحبته
طيب تخيلى انه بدأ يوزعها على الشلة
طيب تخيلى لو عمل بروفايل باسمك وحط فيه صورك وقال كلام مش تمام عنك
طيب تخيلى لو خد صورك وركب عليها صور ونشرها
أنتى دلوقتى أكيد بتقولى مش للدرجادى….أكيد مبيحصلش كده….
والله العظيم بيحصل…لأن الدين مستهدف من الجميع لأنه دين الحق فممكن يعملوا أى حاجه تفسد أخلاقنا
طيب أقرأى كلام ربنا لزوجات النبى (اعظم نساء الامة)
((فَلَا تَخْضَعْنَ بِالْقَوْلِ فَيَطْمَعَ الَّذِي فِي قَلْبِهِ مَرَضٌ وَقُلْنَ قَوْلًا مَّعْرُوفًا))
على الرغم انهن أعظم نساء الأمه ومش ممكن واحدة من امهات المؤمنين يشك فيها
ولكن ربنا حذرهم من أصحاب القلوب المريضة وما اكثرهم هذه الايام



أنا كنت فى صفحه ما…وكان فيه شاب مسلم عمل جرووب بيدعى فيه البنات المسيحيات أنهم يشيلوا صورهم …وكلمهم كلام عقلانى وجميل
جه واحد مسيحى ورد عليه وقال: ما فيه بنات مسلمات محجبات وبيحطوا صورهم على الفيس بوك !!!..للأسف…

طيب انا هسألك سؤال برىء
تقبلى ان حد غريب يصورك وانتى فى الشارع ((ومعنى كده أنه هيبقى عنده صوره ليكى ))
أكيــــد …لا طبعا
طيب ليه التنازل ده؟! طيب مش خايفه إنك تموتى…هيبقى مصير صورك أيه …تعرفى!!
فى(( بعض)) أخواتنا بيضعوا صورهم الشخصيه لعل وعسى…يأتى لها عريس وتتجوز قبل القطر ما يفوتها(زى الأمهات ما بيقولوا..حسب فكرهم)
ومستغربوش فيه كده فعلاً
أنا هرد عليها بكلمات بسيطه جداً….
قال رسول الله صلى الله عليه وسلم… لا يحملن أحدكم استبطاء الرزق أن يطلبه بمعصية الله ، فإن الله تعالى لا ينال ما عنده إلا بطاعته
يعني اوعي علشان الرزق اتأخر شوية تعصي ربنا علشان تطلبيه(( بوضع صورتك الشخصيه ليراها كل من هب ودب))…
خليكي فاكره كويس…. ما عند الله لا ينال إلا بطاعته
وخلى الايه دى فى قلبك على طول…..
(وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ )
وتذكري أيضا قول الله تعالى:
وَلَوْ أَنَّ أَهْلَ الْقُرَى ءامَنُوا وَاتَّقَوْا لَفَتَحْنَا عَلَيْهِمْ بَرَكَاتٍ مِنَ السَّمَاءِ وَالأَرْضِ وَلَكِنْ كَذَّبُوا فَأَخَذْنَاهُمْ بِمَا كَانُوا يَكْسِبُونَ)



طيب فيه بعض البنات بيقولوا أنها ممكن تحط صورتها…. لأن أصحابها اللى موجودين عندها فى البروفايل كلهم بنات
فقولتلهم … طيب ممكن أى حد يشوفها لأنها صوره البروفايل….
ردوا عليا وقالوا ….. مافيش أى حد بيشوفها لأنى متصوره من بعيد ومش باينه لأى حد
الرد بسيــــط…من فتره كده سمعنا كلنا أن حصل أختراق لموقع الفيس بوك وتوقف كام ساعه
مع أنه موقع عالمى والمفروض أن مينفعش أى حد يخترقه..ولكن تم أختراقه
ساعتها بقى مش ممكن أى حد يأخد صورك ويعمل فيها اللى هو عايزه؟!!!
هيبقى أيه رأيك لما تلاقى صورتك مع ناس أنتى مش عارفاهم!!!



أختى فى الله أنتى غاليه عند ربنا أوى
اوعى تفرطى فى نفسك
اوعى تكونى زى الاكسسوارات الرخيصة من ايد للايد وعمرها قصير
غلّى نفسك بثيابك
غلّى نفسى بحجابك
غلّى نفسك بجلبابك
غلّى نفسك بأخلاقك
غلّى نفسك بلسانك
غّلى نفسك بكلامك
غلّى نفسك بألتزامك
غلّى نفسك بأصحابك
غّلى نفسك بأعمالك
خليكى غالية و اوعى تنسى
وفكرى نفسك دايما وقولى
انا مسلمة.. فأنا غالية




طيب نيجى بقى الثانى من حديثنا للبنات اللى بيحطو صور للمثلات عاريات أو مغنيات أو…….

هسألك سؤال أختى الكريمه….
تقبلى انك تكونى مكان الممثله أو المغنيه دى بلبسها وشكلها ده ؟!!!
أكيــــد لأ طبعاً
طيب ليه تحطى صورتها على بروفايلك
حطى صورة تعبر عنك وعن أخلاقك
سؤال كمان وخلاص ))
انتوا يا جماعة عارفين ان ده حرام؟؟
يعنى هل إنتوا مدركين انكم بتعملوا شىء حرام بإنكم حاطين صور لبنات لابسة عريان أو صور تعمل فتنة؟
أكيد أنتوا عارفين انها حرام..
بس سبحان الله بلاقى بنات بتقول كلام جميل جداً فى تعليق على موضوع دينى وصوره بروفيلها لاتليق مع الكلام اللى هى كتباه
طيب ليه التناقض ده طيب!!!
فى بعض الناس تقول أنها صورة عادية يعنى و ايه المشكلة لما أحط صورة ممثلة لابسة ضيق و لا قصير… هو انا اللى لابسة و لا هى؟؟
هقولك طبعاً هى اللى لابسة .. بس انتى الى بتخاللينى اشوفها عن طريقك يعنى انتى اتسببتى فى انى ارتكب ذنب و كده يبقى انتى أصبحتى مصدر الذنب زيك زيها بالظبط…..وهتشيلى ذنوبى وذنوب كل اللى هيشفوها…
وزى ما قال رسول الله صلى الله عليه وسلم…. إن الزنا ليس زنا الفرج فقط، بل العين تزني وزناها النظر، والأذن تزني وزناها السمع….
طيب هى لبست عريان و انتى شيلتى معاها ذنوب!! ده يرضيكى؟
يرضى مين يا جماعة تشيلوا ذنوب مالكوش ذنب فيها؟..


سؤال كمان معلش أستحملونى….
انتوا عارفين إيه اللى ممكن يحصل لو أنتوا حطيتو صور الممثلات دى؟؟
عدوا معايا
———————–
أولاً….. مجاهرة بالذنب.. يعنى بتعملى الذنب بشكل علنى و بتجاهرى بيه… وفى هذه النقطه قال سيدنا محمد صلى الله عليه و سلم…
“كل أمتى معاف إلا المجاهرين” يرضيكى تكونى من المجهارين بالذنب؟؟ يعنى تعملى الذنب(اتفقنا ان حرام فى الأول) و لا يهمك ان الناس تعرف عادى كده!!
ثانيا سيئة جارية.. دى بقة فى منتهى منتهى منتهى الخطورة… تبقى حضرتك كده قاعدة لا بيكى و لا عليكى ..و فى عداد ذنوب عمال يعد بالليل و النهار و انتى و لا دريانة لحد ما تقابلى ربنا يوم القيامة و على كتافك جبااااااال ذنوب مكونتيش عاملة حسابها!!…
عمرك اتخيلتى كده انتى مسافرة مصيف لمدة شهر مثلا و سايبة تكييف الشقة قدرته مثلا 12 حصان شغال بشكل متواصل… تخيلى لما ترجعى حيكون عداد النور عمل قد ايه استهلاك وكل ده ع الفاتوره

ما بالك بقة بعداد الذنوب.. و دى بقة مش فلوس… دى ذنوووووب يعنى و العياذ بالله كلام جد مش هزار و فى جهنم مستنية .. و نعوذ بالله من جهنم و انا و الله خايف عليكى و بنصحك لوجه الله
شوفى سيدنا محمد قال ايه فى الموضوع ده…
قال صل الله عليه وسلم:
من دعا إلى هدىً، كان له من الأجر مثل أجور من تبعه لا ينقص ذلك من أجورهم شيئاً، ومن دعا إلى ضلالةٍ، كان عليه من الإثم مثل آثام من تبعه لا ينقص من آثامهم شيئاً



ثالثا بتنشرى الفساد أو حسب التعبير القرآنى.. تسعى فى الأرض فساداً لإنك بتساهمى فى نشر اشياء تحث على الرزيلة مع ان ده مش فى بالك و لا قصدك
انتى مستوعبة حجم الحكاية دى كبير قد ايه
و خدى بالك ان ربنا عز و جل قال
إِنَّمَا جَزَاءُ الَّذِينَ يُحَارِبُونَ اللَّهَ وَرَسُولَهُ وَيَسْعَوْنَ فِي الْأَرْضِ فَسَادًا أَنْ يُقَتَّلُوا أَوْ يُصَلَّبُوا أَوْ تُقَطَّعَ أَيْدِيهِمْ وَأَرْجُلُهُمْ مِنْ خِلَافٍ أَوْ يُنْفَوْا مِنَ الْأَرْضِ ذَ?لِكَ لَهُمْ خِزْيٌ فِي الدُّنْيَا وَلَهُمْ فِي الْآخِرَةِ عَذَابٌ عَظِيمٌ
طبعا انتى مش فى بالك ان الكلام ده كله علشان حتة صورة لا راحت و لا جات… لكن افكرك بحديث سيدنا محمد لما قال.. ان المرء ليقول الكلمة لا يلقى لها بالاً فتلقى به فى جهنم سبعين خريفاً..
ده من كلمة واحدة ما بالك بقة بفعل؟؟




رابعا: بتشجعى غيرك على نفس الفعل و بكده انتى مش بس بتشيلى ذنوب اللى يشوف الصور.. لااااااا ده انتى كمان بتشيلى ذنوب اللى حط صور زى اللى انتى بتحطيها عشان عجبتها الفكرة من خلالك.. و طبعا ذنوب اللى يتفرجوا على الصور دى من خلال الناس دول!!!! يعنى خرااااااااب مستعجل و من جميع النواحى





فى بنات كتير جداً بتحط صور منافيه للآداااب….بس تحث من كلامهم أنهم ما شاء الله بيحبوا الدين وخايفين عليه….فبمجرد أنك تعرفها أن ده حرام …بتغير الصوره علطول… شوفتوا ازاى ان فى ناس بتعمل الغلط بس عن جهل مش عمد؟



كده أنتهى الكلام وأكيد فيه ناس دلوقتى بتقول وانت مالك …..أنت سايب كل حاجه وجى تكلمنا أحنا….خليك فى نفسك الأول….هو أنت شيخ
أنا مش شيخ ولا حاجه……
لأن مش أى حد سمع خطبه ولا محاضره دينيه بقى شيخ…ولكن
بمنتهى البساطه الكلام ده مش فى الإسلام ….من على غير الإسلام بس هو اللى يقول كده …الناس اللى هما على دين غير الإسلام والعياذ بالله هما اللى عندهم ان الواحد يعمل الخطا و محدش يقوله أى حاجة.. انما الإسلام شىء مختلف تماماً… ربنا عز و جل قال عن المسلمين حاجة جميلة جدا
كُنْتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنْكَرِ
اللهم أجعلنا منهم يارب…..
يعنى المسلمين هم خير أمة علشان بنأمر بالمعروف و ننهى عن المنكر.. واللى بيعرض عن هذا بيلعنه الله عز وجل
و سيدنا محمد صلى الله عليه و سلم قال برضه إذا رأى أحدكم منكراً فاليغيره بيده, و إن لم يستطع فبلسانه, و إن لم يستطع فبقلبه و ذلك أضعف الإيمان.. صدق رسول الله صلى الله عليه و سلم
الكلام ده يا جماعة مش مقصود بيه شخص معين.. لا ده مقصود بيه كل البنات المسلمات اللى بخاف عليهم زى اخواتى وربى يعلم
قال الإمام على بن أبى طالب كرم الله وجهه…. أشد الذنوب ما استهان به صاحبه
…. لا تنظر لصغر المعصية .. بل انظر لعظمة من عصيت…..
و قال تعالى : وَتَحْسَبُونَهُ هَيِّنًا وَهُوَ عِنْدَ اللَّهِ عَظِيمٌ
عذراً للإطاله… بس فعلاً الموضوع فى غايه الأهميه …وكل الكلام ده من باب النصيحه وحب الخير للغير
وأستاذنكم فى نشر المقال ….ليصل لأكبر قدر من المسلمات
رحم الله من نقلها عني وجعلها بميزان حسناتكم
اللهم اجعلنا من الذين يستمعون القول فيتبعون أحسنه
آمين
وفقنا الله وأياكم لما يحب ويرضى…..
وأسأل الله أن يجعل ما قلته لكم زاداً إلى حسن المصير إليه..إنه بكل جميل كفيل وهو حسبنا الله ونعم الوكيل
وصلى الله وبارك على نبينا محمد وعلى آله وصحبه وسلم…والحمد لله رب العالمين 

للمشاركة والرد على الموضوع

أرسل فقط إلى العنوان التالي

       


al7waar@yahoogroups.com

هذه المجموعة مخصصة للدعوة إلى الله

والحوار الأخوي بين الأديان والمذاهب

نشترط فقط الأدب والدليل